Generell informasjon
Er båtførarprøva obligatorisk?
Ja, dersom du er fødd 1.1.1980 eller seinare og skal føre ein båt over 8 meter eller med motor over 25 hk. Når du består prøva, får du båtførarbeviset.
Kvar kan eg ta båtførarprøva?
Du kan ta prøva på eit av testsentera våre rundt om i landet.
Eg har ikkje norsk fødselsnummer. Korleis kan eg registrere meg?
Utan norsk fødselsnummer registrerer du deg til prøva gjennom eit av testsentera våre. Ta direkte kontakt med testsenteret.
Kor stor båt kan eg føre med båtførarbeviset?
Du kan føre fritidsbåt, inkludert vasscooter, opp til 15 meter og opp til 50 knop.
Kor gammal må eg vere for å ta båtførarprøva?
Du må ha fylt 14 år for å ta prøva. Beviset blir utferda når du fyller 16 år.
Kva reglar gjeld for å føre ein fritidsbåt?
Du må vere minst 16 år for å føre ein fritidsbåt over 8 meter eller med motor over 10 hk.
Er du fødd 1.1.1980 eller seinare, treng du båtførarbevis for båtar over 8 meter eller over 25 hk.
For båtar over 15 meter treng du minst fritidsskippersertifikat. Kan båten gå 50 knop eller meir, treng du i tillegg høyhastighetsbevis.
Om eksamen
Kva er pensum?
Pensum skildrar kva du må kunne til prøva, og kva krav som blir stilte til båtførarkurs.
Kan eg ta båtførarprøva på engelsk?
Ja. Prøva finst på både norsk og engelsk, og du vel språk når du startar prøva på testsenteret.
Pensum finst også på engelsk, og nokre kurstilbydarar held kurs på engelsk.
Kan eg ta det som privatist?
Ja. Kontakt eit godkjent testsenter for å avtale tid.
Korleis kan eg førebu meg til prøva?
Du kan ta kurs i klasserom eller på nett, øve med appar eller lese bøker. Vi har samla ei oversikt over tilboda, også kurs på engelsk.
Kva kostar båtførarprøva?
Prøva kostar kr 940,-. Består du ikkje, kostar kvart nytt forsøk kr 495,-.
Kva lærer eg ved å ta båtførarprøva?
Du lærer navigasjon og bruk av navigasjonsinstrument, lanterner, naudsignal og trafikkreglane på sjøen.
Du lærer også sjømannskap, trygg bruk av båt og kva du gjer i ein naudsituasjon.
Kvar finn eg lovverket om båtførarprøva og fritidsbåtar?
Reglane står i forskrifta om minstealder og båtførarbevis for førar av fritidsbåt.
Kva er kravet for å bestå båtførarprøva?
Du må ha minst 80 % totalt, og minst 80 % i emne 4 «Særskilt viktige emne».
Kor mange forsøk har eg på å bestå prøva?
Du kan ta prøva så mange gonger du vil, men det er ei karantenetid på 14 dagar mellom kvart forsøk. Kvart nytt forsøk (kontinuasjonseksamen) kostar kr 495,-.
Om båtførarbeviset
Når får eg båtførarbeviset mitt?
Du får beviset i posten, normalt innan 2–3 veker etter at du har bestått, og biletet ditt må vere godkjent først. Vi tilrår difor at du tek prøva i god tid før du treng beviset.
Er det mogleg å få sendt beviset til ei mellombels adresse?
Ja, vi kan sende beviset til ei c/o-adresse. Send oss ein e-post med adressa du vil ha beviset sendt til, og namnet på personen som bur der.
Personen som tek imot posten for deg, må ha namnet sitt tydeleg på postkassen.
Eg treng engelsk tekst på båtførarbeviset. Kva gjer eg?
Du treng ikkje gjere noko. Baksida av båtførarbeviset stadfestar kunnskapen din på både norsk og engelsk.
Kan eg føre båt i utlandet med båtførarbeviset?
Båtførarbeviset gir deg rett til å føre båt i Noreg. Det er ikkje sikkert at det er godkjent i andre land, så vi tilrår at du sjekkar kva reglar som gjeld der du skal.
Mange land krev eit International Certificate of Competence (ICC), som er ein internasjonal standard for fritidsbåtsertifikat.
Kan eg bruke eit utanlandsk båtførarbevis i Noreg?
Ja, Noreg godtek utanlandske båtførarbevis, så sant:
- du har med deg originalbeviset
- beviset inneheld ei skildring av det på engelsk
- du har ei engelsk omsetjing av pensumet som beviset ditt dekkjer
- dette pensumet dekkjer pensumet til det norske båtførarbeviset
Er du usikker på beviset ditt, kan du kontakte oss eller Sjøfartsdirektoratet.
Eg har mista båtførarbeviset. Kva gjer eg?
Du kan søkje om eit nytt bevis (duplikat).
Kan eg få utferda båtførarbevis med høgare maritim utdanning/sertifikat?
Ja, dersom du har eitt av desse:
- Fritidsskippersertifikat eller fritidsbåtskippersertifikat (D5L/D5LA)
- Dekksoffisersertifikat
- Militære maritime sertifikat av tilsvarande grad
- Anerkjent utanlandsk båtførar- eller kvalifikasjonsbevis med like eller høgare førarrettar enn det norske båtførarbeviset. Legg ved dokumentasjon på at beviset er nasjonalt anerkjent.
Har du anna teoretisk kompetanse, må du sjølv sende oss nok dokumentasjon. Dokumentasjonen må vise at utdanninga dekkjer hovudelementa i pensum til båtførarprøva. Det er til dømes ikkje nok å vise til eit vitnemål med «Prosjekt til fordypning» eller «Tverrfaglig eksamen». Legg også ved fagplanen eller læringskrava som skildrar innhaldet i faget.
Dette gjer du gjennom ein duplikatsøknad.